– Det er ikkje mykje som har kome opp enda. Noko kantarell, og litt piggsopp, men ikkje noko særleg så langt, fortel Marte Gjestland i Trondheim sopp- og nyttevekstforening. Ho er ein av dei som følgjer vêrmeldinga nøye med tanke på sankemoglegheitene i skogen.

VENTAR: Marthe Gjestland håpar september vil bringe mykje sopp. Her med ein stor steinsopp i skogen.

Foto: Randulf Valle/Friluftsliv.no

Seinare enn vanleg

Båre i nord og sør tittar dei smakfulle godbitane fram seinare enn dei gjorde i fjor. Soppforeininga kan fortelje at det ser ut til å bli eit godt kantarellår på austlandet, men i kaldare strøk er det meir usikkert.

– Nedbør er det viktigaste for soppen. Det har vore mykje regn i sommar, så det lover godt. Faren er at det kanskje har vore for kaldt, seier Gjestland.

Difor ser ho med glede at yr.no lovar litt varmare tider neste veke, og håpar at det kan bety mykje godt i korga.

– Vi er lova ei veke med varmt vêr no, og det kan hjelpe, men eg er veldig spent på kva som skjer. Blir det for tørt så vil ikkje soppen kome opp i det heile.

• LES OGSÅ:Gode sopptips frå UT.no

Mellom bærsesongane

Soppkontrolløren har god greie på det som veks i krikar og krokar under lyng og bjørk. Mellom blåbær- og tyttebærplukking om hausten er det dei runde hattane som får merksemda. No ventar ho på september.

– Vi kallar det jo gjerne for "sopptember". I fjor hadde vi ein veldig god sesong, men i år har eg ikkje fått rapportar om spesielt mykje sopp. Vi har sett veldig lite raudskrubb i år, og det er vanlegvis ein tidleg sopp. Den har glimra med sitt fråvêr, seier Gjestland.

Ho trur likevel at dei vanlege soppane, som kantarell og piggsopp, vil komme som normalt. Og ho har gode tips til kvar ein bør leite:

– I fjellet bør ein sjå etter eit bjørkebelte, der er det gjerne kantarell. I låglandet er det lurast å sjå i ei nord- eller austhelling. Sjå etter lommer i skogen, der det er lysare, og langs stiar. Det er viktig at det ikkje er for tørt, forklarer soppentusiasten.

• LES OGSÅ:Slik lagar du deilig soppsuppe

Tidleg frost er største fare

Trass i ein deprimerande kald sommar fleire stader i landet, tek ikkje Gjestland sorgene på forskot.

– Det er litt usikkert, men vi får jo alltid sopp, så vi må rekne med vi får det i år også. Det som kan stoppe det er om frosten kjem tidleg. Då er det slutt.

Når det lite sopp, er mange også spesielt opptekne av å halde dei gode soppstadene skjult.

– Når du finn din kantarellstad så seier du det ikkje til nokon, spøker Gjestland.

• LES OGSÅ:Slik lagar du mandelpotetkrem med kantarell