Seint på våren og tidleg på sommaren finn nye hjortekalvar vegen til verda. Mora, kolla, er halmstrået til dei nye kalvane. I eitt heilt år brukar kalvane å følgje mora.

Spesielt dei første månadene er det viktig at hjortekalvane har mora fram føre seg.

– Dersom ein kalv mistar mora tidleg i livet, så har den dårlege føresetnader for å overleve hausten og vinteren. Det er ei klar sak at vi ikkje vil at morlause kalvar skal gå i skogen, seier Tormod B. Bugge Meisingset i Naturforvaltninga.

Kalvane kan ligge gøymt

For uhell kan skje. Hjortejakt er ein klar del av Noreg, og mange får koller i siktet sitt.

Ein jeger skal derimot vere 100 prosent sikker på at kolla ikkje har kalv før skot blir avfyrt.

– Ein skal gjere alt ein kan for å forsikre seg. Somme kalvar er tett på mora, andre ligg i vegetasjonen rundt. Kalven er heilt avhengig av mora på denne tida, seier Meisingset.

• LES OGSÅ: Difor har geværkolben 361 hakk
• LES OGSÅ: Førebur seg på hjortejakta

Jaktstart i år er 1. september, mot 10. september i tidlegare år. Det byr på ekstra store utfordringar.

– Akkurat no er det meir sannsynleg at kalven ikkje følgjer mora. Så ein må vere observant.

– Kalven følgjer ikkje mora?

– Når mora kjem ut og beitar, så brukar kalven å ligge igjen i skogkanten. I ein jaktsituasjon kjem kalven ganske langt etter for den er ikkje like rask. Så ein kan fort tru at kolla er kalvelaus, fortel Meisingset.

I staden kan kalven følgje 100 meter bak.

Saka held fram under bildet.

Hjortejakt er ein stor del av norsk jakt. Her er to hjortar ute i den norske vegetasjonen.

NRK

– Gjer det du kan for å felle kalven òg

Å ikkje skyte koller med kalv er ein klar del av jegeropplæringa. Alle skal vite om det, ifølgje Meisingset. Dersom det først skulle skje uhell er naturforvaltaren klar på kva som må gjerast.

– Dersom ein skyt ei kolle så må jura sjekkast for mjølk. Er der mjølk, er der ein kalv i nærleiken. Då må ein gjere det ein kan for å felle kalven òg. Legg ned den nødvendige innsatsen!

• LES OGSÅ: Vil ta hjorten før møringene
• LES OGSÅ: Her bor det flere hjort enn folk

Om ikkje kan kalven gå ei trasig tid i møte.

– Utan mora har dei vanskeleg for å ta til seg næring og mat. Dei mistar livsvisdom som går frå mor til unge, og dei får heilt andre føresetnader enn dei kalvane som følgjer mora første del av livet.

– Ein sparer kalven for liding ved å skyte han òg, dersom mora blir skote. Dyrevelferd, rett og slett. Ein kalv har det ikkje godt om han er utrygg og utan mat.

Den enkle hovudregelen til Meisingset er:

– Dersom ein er i tvil, så skal ein ikkje skyte, avsluttar naturforvaltaren – og oppmodar til jakt på hjortebukkar i byrjinga.