Fottur til Eikåsnipa

Eikåsnipa er ein flott fjelltur i vestlegaste del av Jølster. På toppen får du flott utsikt austover mot Vassenden og Jølstravatnet.

Frå Eikåsvegen følgjer du bratt skogsveg som går opp rett sør for brua over Storegrova. Der skogsvegen deler seg vel du vegen som går i nordleg retning. Følg vegen vidare heilt opp til Ytre Eikåsstøylen (500 moh.) På støylen opnar utsikta seg mot Jølstravatnet. Rett ovanfor støylshuset går du inn på sti i nordvestleg retning. Stien går i ope og tørt lyngterreng. Når du nærmar deg toppen flatar terrenget litt ut, og det vert noko meir myrlendt. Her dreiar stien vestleg retning opp mot toppen av Eikåsnipa.

Tips:
Det går merka sti frå Eikåsnipa i vestleg retning ned til Flugedalen (Angedalen).

For å få betre utsikt mot Førde kan du lage deg ei runde på toppen. Terrenget er lett kupert rundt Storetjørna.

Fakta:
Ytre Eikåsstøylen 1,4 km og 300 høgdemeter
Eikåsnipa 2,5 kilometer og 650 høgdemeter
Tid: 2,5-3 timar opp og 4 -4,5 timar timar t/r.

Hugs:

• All ferdsel er på eige ansvar
• Du kan ferdast fritt i utmark til fots
• Fri ferdsel skal ikkje vere til skade eller ulempe for andre, eller for plante- og dyreliv
• Det er bandtvang i Sunnfjord kommune i perioden 1. april – 1. november
• Der stiane går over innmark og beiteområde må du vise ekstra omsyn, og late att grindene etter deg

Turen er lagt ut i samarbeid med Fjelltrimgruppa i Jølster IL.