Halvgjerda og Slåttestøylen

Halvgjerda er ein flott avrunda topp på 856 moh. Fjellet byr på flott utsikt mot Kvamshestane i Gaular i vest, byfjella i Førde, grendene på Eikås, byggefelta på Vassenden og Jølstravatnet.

Du startar ved gardane på Slåtten, der du først går på eldre skogsveg det første partiet mot Slåttestøylen. Det er flott sti å gå på heile vegen til støylen. Siste partiet før støylen er det eit kort parti der det er litt bratt, og det er nokre sva, som kan vere litt glatte når det er vått i terrenget. Flott utsikt mot Vassenden frå støylen. Stien går vidare mot sør i ganske flatt og lett terreng inn Slåtteskaret. Når du startartar på stigningen i retning vest, får du utsikt mot vatnet på Holsen. Vel oppe på toppen av Halvgjerda ventar ein nydeleg varde på deg, samt ei flott og vid utsikt! 

Halvgjerda har eit stort og vidt topp-platå som er verdt å utforske nærmare. Det står nok ein varde på vestsida av fjellet. Denne er mindre besøkt og meir ukjent enn toppvarden. Ved å gå ei runde i vestleg retning frå toppvarden vil du finne denne mindre varden. Frå denne er utsikta i retning Mo heilt annleis enn frå toppunktet. Om du frå denne varden så går i austleg retning igjen vil du etter kvart kome inn att på stien du kom opp. 

Turen tek kring 1,5 til 2 timar opp til toppvarden. Flott og lett terreng å gå i heile vegen. Dette er ein fjelltur som passar godt for barnefamiliar som vil prøve seg på ein fjelltur der utsikta er stor.  

AC Kapstad for IST