Kyststien Strandvegen

Strandvegen går langs kysten mellom dei to friluftsområda Mobergsvikjo og Smievågen. Skilt syner vegval undervegs. Turen startar vis-a-vis Os rådhus og går austover. Like før du går over brua mot Oselevarverkstaden heng det ei informasjonstavle som er nyttig å lesa på. Ta gjerne eit stopp på brua og sjå om du ser laks som ventar på å ta seg oppover vassdraget.

Kyststien følgjer smal bilveg og tursti via Oselvarverkstaden med museum, Lyngheimtunet, Solstrand Hotel & Bad og Moldegårdparken, før han ender opp ved friluftsområdet Smievågen. Kyststien har utsikt mot fjord og fjell, og du vil òg sjå glimt av Folgefonna. Turen er om lag 3,8 km lang.