Fottur til Bjørsetstøylen og Bjørsetfjellet frå Hegrenesåsen

Bjørsetstøylen ligg svært vakkert plassert med stor og opa utsikt vestover mot Jølstravatnet. Utsikta har du med deg på store delar av stien opp frå Hegrenesåsen, og heilt opp til Bjørsetfjellet. Om våren vert denne ruta opp ofte tidleg snøfri, mens du om haustane kan oppleve spektakulær solnedgang over Jølstravatnet når sola sig ned bakom Tindefjellet.

Turen startar frå toppen av hyttefeltet på Hegrenes på Ålhus. Noko bratt terreng i austleg retning, før stien dreiar i sørleg retning oppover til Nova. Her møter du flott utsiktspunkt der du får første smakebiten på utsikta som ventar deg høgare oppe.

Frå Nova går du innover fjellsida i søraustleg retning eit godt stykke i ganske flatt og lettgått beiteterreng. I enden av dette flate partiet møter du på nokre berg du må ta deg opp. Her dreiar stien i nordleg retning eit kort stykke oppover berga. Berga kan på våte dagar vere noko glatte å gå på. Det er tre og anna å halde seg i opp dette partiet.

Etter å ha passert berga går stien vidare i open skog i nordvestleg retning opp til ryggen der utsikta opnar seg vestover igjen. No har du kome ut av skogen, og du går vidare i austleg retning på ryggen med den opne utsikta vestover mot Jølstravatnet bak deg. Når du har tatt deg opp til rundt 800 moh. passerer du eit lite gjengrodd fjellvatn rett før stien delar seg. For å nå ut til Bjørsetstøylen held du fram i søraustleg retning der du må ta deg litt nedover til Bjørsetstøylen.

Frå Bjørsetstøylen går du attende til stikrysset og går vidare å sti i austleg retning oppover mot høgda 922 moh. No har du tatt det meste av høgdemeter, og stien går med jamn svak stigning i nordaustleg retning vidare innover det store kuperte fjellplatået. Stien passerer sør for høgda 980 moh., og passerer nokre fjellvatn før du kjem inn tl høste punktet på Bjørsetfjellet på 1003 moh. Det er på dette punktet som er det endelege målet for denne turskildringa.

Tips
Om du ikkje vil gå heilt til Bjørsetstøylen er det ein flott tur å gå opp byggefeltet og hyttefeltet i Hegrenesåsen, og ta seg opp til utsiktspunktet på Nova.

Det går ein sti rett opp frå Bjørsetstøylen mot Bjørsetfjellet. Denne ligg i kortlaget og går i nordleg retning opp dei bratte liene rett ovanfor støylen. Stien kjem på eit punkt inn på stien som i denne turskildringa er spora opp til Bjørsetfjellet.

Når du står på Bjørsetfjellet på høgda 1003 moh. går det sti vidare i nordleg retning over det relativt flate store fjellplatået. Du kan ta deg ut til høgdene på 1002 moh. og til Mosesvarden, som er merka rute til frå Årdal i Jølster (sjå lenke). Utsikta frå desse høgdene gir flott utsikt austover Jølstravatnet.

Turbok i postkasse på det restaurerte selet som ligg sørlegast på støylstomta. Her må du gjerne skrive deg inn - og så kan du lese litt meir om støylen i boka.

På Bjørsetstøylen er det i dag mykje sau som beitar. Ta omsyn til dyra og ver venleg å ta med deg boss heimatt.

Det lite vatn undervegs på ruta opp frå Hegrenesåsen. På støylen er det stort sett alltid vatn i bekk/oppkome i jølet aust for støylen.

Du kan og gå sti ned til Bjørset frå støylen. Frå Bjørsetfjellet kan du ta deg ned til grenda Årdal. Sjå lenke for å lese meir om desse turmåla.

Fakta
Frå Hegrenesåsen til Bjørsetstøylen: Omlag 2,2 kilometer kvar veg og 470 høgdemeter. Tid: 1,5-2 timar opp og 3 -3,5 timar t/r.

Frå Hegrenesåsen til Bjørsetfjellet (1003 moh.): Omlag 5 kilometer kvar veg og 10 kilometer t/r, og 700 høgdemeter. Tid: 3,5-4 timar opp og 6-7 timar t/r.

Hugs:

• All ferdsel er på eige ansvar

• Du kan ferdast fritt i utmark til fots

• Fri ferdsel skal ikkje vere til skade eller ulempe for andre, eller for plante- og dyreliv

• Det er bandtvang i Sunnfjord kommune i perioden 1. april – 1. november

• Der stiane går over innmark og beiteområde må du vise ekstra omsyn, og late att grindane etter deg

Turen er lagt ut av for Indre Sunnfjord Turlag
ved Anne Cecilie Kapstad, redaktør for UT-turar i Jølster