Juten, 412 moh, Vikebygd

​Turen startar nede ved fylkesvegen. Ruta går via Såta.

Ein tar inn på skogsvegen som har retning nordover i starten, følg skogsvegen i ca. 500 meter oppover. Like etter ei grind, svingar stien skarpt til venstre (nord) før den ikkje lenge etter svingar sørover og oppover mot Såta.

Etter godt og vel 1 km med gonge oppover, i ikkje alt for bratt terreng, flatar stien seg ut og ein kjem inn i eit flatt og fint skogsparti. Her kan ein finna utsiktspunkt ned mot Skartland.
Ein forlèt skogen og går over ei myr, og etter ei lita stigning så er ein på toppen av Såta.

Frå Såta så er det ca. 1.0 km til Juten. Ein går vidare ved å følgje skilt og merkepinnar fram til Juten.
Stien går sørover, først ned ei lita dump til ein kjem til eit skilt der stien delar seg, her held ein rett fram mot Juten. Frå her går stien stort sett igjennom furuskog, men ein er også i ope lende ei stund før ein går ned eit lite søkk, og får ein bratt stigning opp mot ei myr like ved Juten. Ta til høgre her ved skilt, frå her er det er ca. 100 m til toppen av Juten, 412 m.o.h. Juten er ein måneforma topp, med flott utsikt i mange retningar.