Fottur på Dombås - SPOR naturstig|historiecaching 

Bli med på historiecaching med Dovre bibliotek sin lokalhistoriske naturstig. På vegen finn du ti stolpar med qr-koder som tek deg med til spennande historier og møte med menneske som har trakka opp stigar før oss, hulder og tjuvar, drapsmenn og astronomar, språkgeni og gamle samfunnssystem. Stolpane er designa av elevar ved Hjerleid handverskole, og har tematisk utforming. 

Turbeskriving: Start i Dombås sentrum og gå opp mot Dovre ungdomsskule. Følg så nedre sti over Dombåshaugen ved å gå over den gamle handballbana. Her vil du finne første stolpe. Når stigen møter ein breiare veg, tek du ein liten avstikkar oppover for å finne stolpe to. Så går du ned att til du kjem til bilvegen der du svingar til venstre. Etter ca. 200 meter går du vegen ned til høgre merka Brennøygardsvegen. Her ser du stolpe tre. Hald fram til Brennøygarsvegen tek av til høgre. I krysset her finn du stolpe fire. Følg vegen inn til høgre til det går ein blåmerka stig ned på venstre hand. Følg stigen, og du kjem snart til stolpe fem. Her deler stigen seg, men du følger dei blå merka til høgre. Når du kjem til ei lysning finn du stolpe seks. Hald fram ned bakken til du kjem til to bruar. Rett etter den andre brua tek du stigen inn til venstre. Så går du over ei bru til, og tek til høgre ved turmerkinga. No finn du straks stolpe sju. Ta skogsvegen til venstre og følg den til den kjem inn på ein litt breiare veg. Her finn du stolpe åtte. Følg vegen ned til venstre for å finne stolpe ni. Gå vidare ned til elva og bålplassen, her er siste stolpe. For meir infomasjon, sjå her https://express.adobe.com/page/js7P4r00qUEL3/. 

Denne turen tek deg frå Dombås sentrum (630 moh) og ned til elva Lågen. Du går på sti og traktorveg, og det er ei fin runde for heile familien. Turen kan også syklast.

No kan du velje å gå same veg attende, eller ta alternative ruter for ein lengere tur. Du kan følge traktorvegen du gjekk heilt opp att til E136. Så kan du følge gangvegen austover mot Dombås sentrum att. Eit anna alternativ er å følge stigen vidare langs elva, for å kome opp att i Dombås sentrum på sørsida. Da held du fram på den blåmerka stigen til den kjem inn på ein bilveg ved Øyan skytebane. Når du har passert skytebana følger du blåmerking opp ein stig til venstre. Denne kjem etter kvart inn på ein bilveg som du følger til høgre når den deler seg, og så til venstre to gongar. Da vil du kome til Dombås sentrum etter nokre litt bratte oppoverbakkar.