Fottur til Myklebust i Gloppen frå Veiteberg i Jølster

Turen frå Veiteberg til Myklebust er ein eldre ferdselsveg mellom Stardalen i Jølster til Myklebust i Gloppen. Stien snor seg gjennom dalføret med bratte fjellsider, og passerer både støylar og fiskevatn.

Turstart på parkering på Veiteberg i Stardalen. Følg skogsvegen til endes i nordleg retning. Hald fram mot nord til Bakkestøylen, og passer Reinevatnet på austleg side.

Frå Bakkestøylen held du fram på myrlendt sti i nordleg retning innover dalføret, og passer Skitnevatnet på vestleg side. Her kjem du fram til ei lita hytte som står ved kommunegrensa mellom Sunnfjord og Gloppen. Gå vidare i nordleg retning der du passerer Myklebuststøylen før du kjem ned på skogsveg som tek deg nedover Myklebustdalen.

Tips:
Turen har ulike start- og sluttpunkt. Du må ordne deg med skyss, eller gå turen t/r.

Turen til Bakkestøylen er ein enkel tur og høver seg spesielt godt for alle turvandrarar.

Det er fjellaure i Reinevatnet. Ta med deg fiskestonga på tur! Her er det også fint å campe.

Fakta:
Parkering på Veiteberg – Bakkestøylen: 6 km og 320 høgdemeter opp

Veiteberg – Myklebustdalen : 10 kilometer og 330 høgdemeter opp og 320 høgdemeter ned

Hugs:

• All ferdsel er på eige ansvar
• Du kan ferdast fritt i utmark til fots
• Denne turen går tett på nasjonalparkgrensa.
• Fri ferdsel skal ikkje vere til skade eller ulempe for andre, eller for plante- og dyreliv
• Det er bandtvang i Sunnfjord kommune i perioden 1. april – 1. november
• Der stiane går over innmark og beiteområde må du vise ekstra omsyn, og late att grindene etter deg

Turen er lagt ut i samarbeid med Fjelltrimgruppa i Jølster IL.