Nesheimsnipa via Yksendalsstølen

Velkommen til ein flott topptur frå garden Yksendal til Nesheimsnipa (1035 moh.), via Yksendalstølen og Yksendalstrappene.

Turen startar ved garden Yksendal på om lag 460 moh. og følgjer den gamle stølsvegen opp mot Yksendalstølen. Stien er restaurert og utbetra, og langs delar av ruta går du i Yksendalstrappene, bygd av sherpaer frå Nepal. Steintrappene slyngjer seg gjennom det bratte terrenget og har gitt nytt liv til den gamle ferdselsvegen mellom garden og stølen.

Første del av turen går opp til Yksendalstølen på 670 moh. Denne delen er om lag 2,2 km og er blåmerka. På vegen passerer du mellom anna Kvile, tre regulerte vatn og fleire informasjonsskilt som fortel om historia til garden og området. På Yksendalstølen er det ope toalett og gode moglegheiter for å ta ein pause før turen held fram mot fjellet.

Frå Yksendalstølen går turen vidare på raudmerkt sti mot Nesheimsnipa. Her blir terrenget etter kvart brattare og meir krevjande. Ruta går vidare gjennom fleire parti med steintrapper, mellom anna det spektakulære partiet ved Giljane, før den siste oppstigninga mot toppen.

Nesheimsnipa ligg 1035 moh. og byr på vid utsikt langs Eksingedalen i begge retningar, mot Kvitanosi i aust og nordover mot det karakteristiske Raudberget i Stølsheimen.

Frå Yksendalen til Nesheimsnipa er turen om lag 5,5 km éin veg og har rundt 600 høgdemeter. Turen er raudgradert, men ligg i nedre sjiktet av krevjande fotturar.

Heile ruta går gjennom beiteområde for sau, og hundar må haldast i band.

Turen er først og fremst ein barmarkstur. Vinterstid kan ruta vere svært krevjande på grunn av dei bratte partia, og forholda må vurderast nøye.

Alternativ rute: Nesheimsnipa kan òg nåast frå Nesheim og Bergo. Rutene møtest før den siste oppstigninga mot toppen, slik at det siste partiet, mellom anna «Stairway to Heaven», er felles uavhengig av kva side du kjem frå.

God tur!