Rundtur til Fyglafjellet og Håheimsfjellet via dagsturhytta Fjellro og Fyglastøylen

Dette er ein rundtur som byr på nydeleg utsikt over Jølstravatnet, Kjøsnesfjordbrua, Grovabreen, Stardalen, Jostedalsbreen, Skjorta og Breimsvatnet. Med andre ord ein tur med mange vakre utsiktspunkt og naturopplevingar!

Denne turskildringa startar ved Panorama camping og går opp til dagsturhytta Fjellro. Du kan og starte denne rundturen ved Skei Hotel og gå starten av turen via stiane som fører opp frå Skei til dagsturhytta. Sjå lenke for å lese om rundturen frå Skei til dagsturhytta Fjellro.

Frå gangfeltet ved Jølstravegen (E39) ovanfor Panorama camping startar turen. Stien går i nordleg retning opp skogen. Når du nærmar deg dagsturhytta kryssar stiane seg. Stiane møtes igjen lenger oppe. Om du ønsker å gå innom dagstyurhytta følgjer du stien og skiltinga som går i austleg retning. Ved dagsturhytta går du vidare på sti i nordvestleg retning og kjem inn att på nytt stikryss. Her må du velje kva retning du ønsker å gå rundturen din.

Denne skildringa held fram på austlegaste sti som går over myrane austover mot fjellryggen. Stien vert gradvis tørrare og brattare opp mot høgda 771 moh. Frå her held du fram i nordleg retning over ryggane bort til varden og postkassa ved Fyglafjell. Du passerer eit lite fjellvatn og høgda 860 moh. før du går nokre få høgdemeter ned til eit nytt stikryss. Her går stien på sørleg side av det vesle fjellvatnet og vidare oppover lia i nordaustleg retning. Ved eit nytt lite fjellvatn vert stien noko brattare og går meir i nordvestleg retning opp mot ryggen. Når du er på rundt 1 000 moh. dreiar stien i meir nordaustleg retning over fjellplatået. Dette er noko kupert, og det tek litt tid før du kjem heilt bort til varden på Håheimsfjellet.

Når du skal ned att følgjer du stien attende heilt fram til det siste stikrysset ved fjellvatnet rett ved høgda 860 moh. Følg stien i vestleg retning nedover lia. Du passerer etterkvart ei hytte ved Skredestøylen på 860 moh. Følg stien, som går på nordleg side av grova nedover til Fyglastøylen. Frå støylen går du i sørleg retning på god sti ned til Vaelva som du kryssar rett før du kjem inn på stikryss der du tidlegare tok val om kva veg du ville gå rundturen. Følg stien du gikk opp nedover til turstart.

Denne turen er godt skilta og merka.

Tips
På toppen av Håheimsfjellet er det flott utsikt til Stardalen og Breimsvatnet. Det er lurt å ta ei ekstra runde for å nyte utsikta i ulike retningar.

I tillegg til å starte turen ved Skei Hotel kan turen også startast ved å bruke sti som går til dagsturhytta frå Skei skule.

Flotte små badekulpar i elva ved Fyglastøylen.

Fakta
Turen er på omlag 6 km kvar veg, og på totalt 12 km, og 860 høgdemeter. Tid: 5 timar opp og 8 timar t/r.

Turen opp til Fyglastøylen har tidsbruk på omlag 1 time kvar veg. Mens turen til Fyglafjell vil du bruke omlag 4 timar på opp og ned.

Hugs:

• All ferdsel er på eige ansvar

• Du kan ferdast fritt i utmark til fots

• Fri ferdsel skal ikkje vere til skade eller ulempe for andre, eller for plante- og dyreliv

• Det er bandtvang i Sunnfjord kommune i perioden 1. april – 1. november

• Der stiane går over innmark og beiteområde må du vise ekstra omsyn, og late att grindane etter deg

Turen er lagt ut av for Indre Sunnfjord Turlag
ved Anne Cecilie Kapstad, redaktør for UT-turar i Jølster