Fottur til Bolsetnipa (Grepstadnibba)

Dette er ein av dei lettast tilgjengelege utsiktstoppane i Jølster. Det er godt merka og skilta sti i jamt stigande terreng heile vegen til topps. På toppen får du utsikt over Jølstravatnet, Våtedalen, Eggenipa, Stardalen og Snønipa. Turen eignar seg godt som langtur for barnefamiliar og fjellvandrarar som likar turar som ikkje vert for bratte.

Frå Dammen går du på god sti i nordaustleg retning opp heile fjellsida. Det er jamn og fin stigning og lettgått terreng heile vegen. Når du kjem opp på ryggen dreiar stien i nordleg retning over ryggen og ut mot toppen av Bolsetnipa.

Merk: Skogsvegen frå Fossheim til Dammen har siste åra vore delvis stengt av for biltrafikk. Om vegen er stengt må du starte turen med å gå opp skogsvegen frå Fossheim til Dammen.

Tips

• Toppen av Bolsetnipa har eit ganske stort og flatt område. Det er fint å gå seg ei lita runde på toppen for å nyte utsikta i alle retningar mot Stardalen, Våtedalen og Jølstravatnet.
• Når du går på returen er det fint å ta turen oppom Grepstadnibba som er eit av dei to andre høgste punkta på ryggen; høgdene 1238 moh. og 1229 moh.
• Undervegs på stien passerer du eit lite avlangt fjellvatn. Her går det ein sti i nordvestleg retning til Litlenipa på 1024 moh. Toppen vert av lokale kalla Sørnipa. Her er det flott utsikt mot Jølstravatnet og Våtedalen. Kort avstikkar som kan vere verdt å ta med seg pga. utsikta.
• Ved det same avlange vatnet der du kan ta av på sti til Litlenipa (Sørnipa) kan du velje å ta deg opp på toppen som ligg i sørleg retning; Rana på 1016 moh.

Fakta
Turen er på omlag 4 km kvar veg og 700 høgdemeter. Tid: 4 timar opp og 6-7 timar t/r.
Merk: Om skogsvegen frå Fossheim til Dammen er stengt for biltrafikk må du gå (sykle) opp denne. Vegen er på omlag 2,5 km kvar veg (5 km t/r) og 320 høgdemeter. Tid: 1 -2 timar t/r).

Hugs:

• All ferdsel er på eige ansvar

• Du kan ferdast fritt i utmark til fots

• Fri ferdsel skal ikkje vere til skade eller ulempe for andre, eller for plante- og dyreliv

• Det er bandtvang i Sunnfjord kommune i perioden 1. april – 1. november

• Der stiane går over innmark og beiteområde må du vise ekstra omsyn, og late att grindane etter deg

Turen er lagt ut av for Indre Sunnfjord Turlag
ved Anne Cecilie Kapstad, redaktør for UT-turar i Jølster