Tvinnestølen

Tvinnestølen

Om hytta

TVINNESTØLEN

Hytta ligg i Vossafjella ca 7 km nord for Lønahorgi, med kort veg til Volahytta.

Tvinnestølen er ei ubetjent hytte, utan proviant, som er open heile året. Hytta er eit gamalt sjarmerande stølshus; sel, og ligg fint til ved Øvsta Piksvatnet, ca 1060 m.o.h.

I 2017 er hytta blitt oppgradert. Ytterveggen i gangen er panelt og det er komme ny benk. Det er blitt bedre plass til å henja opp klær og ryggsekker.

Det er montert nytt kjøkken med ny gasstopp som gjer det trivelig å laga mat.

Sørveggen har fått nytt glas, isolasjon, vindtetting og bordkledning. Hytta er nymalt. Alt arbeid og transport er utført på dugnad.

Sjølv om hytta er oppussa har me tatt vare på det gamle stølspreget.

Hytta ligg i fjellområdet mellom Voss og Eksingedalen, vest for garden Afdal og aust for Volahytta. I området finn vi fiskevatn nok til å fylla ein heil sommar med gode opplevingar. Det er fine turmogelegheiter i fjella rundt. Det er eit rikt dyreliv i området. Ofte kan ein treffa på reinsdyr, hare og ryper med meir.

Hytta og turområdet passar både for barnefamilar og dei som er spreke.

Hytta har seks køyesenger med dyner og ullteppe. Her er vedfyring, utstyr for matstell og gass til koking.

Området har ikkje mobildekning.

Fasiliteter

  • Fiske
  • Bade
  • Teltplass
  • Vedovn

Tilpasset for

  • Hund

Slik kommer du deg dit

Adkomst sommer

TILKOMST SOMMAR

Du/de kan koma til hytta både frå Tvinne, Bavallen (Voss) og Voladammen. Frå Tvinne går du via garden Afdal og på T-merka sti til Preststølen. Vidare er det ei seig stigning opp Tvinnekleivane og gjennom eit skar til du får auga på hytta som ligg ved Øvsta Piksvatnet (ca 3 timar frå Afdal). Om sommaren kan du og koma til hytta frå Voladammen via Volahytta eller frå Torvedalshytta via Volahytta. Vest for hytta ligg det ofte ei bratt snøfonn til langt på sommaren. Du kan då fylgja T-merka sti på nordsida av vatnet.

Adkomst vinter

TILKOMST VINTER

Om vinteren kan du gå frå Bavallen, om Lønahorgi. Alternativt kan du gå frå Afdal eller Eenstølen. Frå Afdalen føl du sommartraseen.

Frå Afdal: Parker før brua, og fylg skogsvegen oppover til Preststølen. Herifrå vidare på T merka sti (vinterstid er T merkinga delvis synleg på trea)

Frå Preststølen er det litt bratt oppover gjennom skogen. Over skoggrensa går ein vestover mot Tvinnekleivane. Dette er det brattaste partiet på turen. Vanlegvis er det trygt å traversere opp mellom dei avblåste steinane. Vurdèr likevel tryggleiken då forholda endrar seg raskt.

Ovanfor Tvinnekleivane er terrenget slakare vestover mot høgaste punktet på turen, ca 1170moh. Vidare mot skaret i fjellrekka over Tvinnestølen. Herifrå vil ein sjå hytta. Nedover til hytta herifrå.

Vidare til Volahytta:

Alternativ 1: Sørover over vatnet på sørsida av hytta, forbi utløpet. Vidare sørvestover til Nedsta Piksvatnet. ( Dette vatnet er regulert/nedtappa og det kan være vanskeleg å kome seg ned på isen) Vidare over Nedsta Piksvatnet i retning Volahytta. Terrenget her kan være utfordrande då området er væreutsatt og skapar snøformasjonar. Rundt hytta er det bratte parti og ein må vurdere god veg ned.

Alternativ 2: Anbefalt rute: Gå over vatnet på nordsida av Tvinnestølen , fortset vestover over neste vatn og litt til slik at du finn den slake trasèen opp til høgdedraget. Fyl høgdedraget vidare mot Volahytta. Ved kryssing av Trolldalen kan det være nokre bratte parti, likeeins ned mot Volahytta. Rundt hytta er det bratte parti og ein må vurdere god veg ned.

Papirkart

Kartblad: 050 Vikafjell