Hytta ligg ved Torfinnsvatnet i vestenden av Gråsidefjellet i den sørlege delen av Voss. Hytta har stort opphaldsrom, kjøkken og seks soverom med tilsaman 28 køyer med utstyr. Her er godt utstyrt kjøkken, med kjøleskåp og komfyr. Straum til koking og oppvarming. Hytta var brakkeby ved reguleringa i området, og Voss Utferdslag fekk kjøpa hytta hjå BKK i 1956. Hytta har nokre senger for førehandstinging.

Frå Hodnaberg går T-merka sti fram til hytta, gangtid ein god time. Hytta ligg på den T-merka ruta over Gråsida, og frå hytta kan ein gå austover mot Timaglaset og vidare over Sandfjellet, framom Roset og ned til garden Gjelle. (Timaglaset er ein karakteristisk stein som også er å finna i logoen til Voss Utferdslag). Går du om Timaglaset er det ein raudmerkt sti til DNT hytta Nansenbu frå denne stien.

Før påske vert ruta over Gråsida kvista.

Sommarsdagen er det og T-merka sti til Vending.

Hytta har ikkje proviant.