Hammarsegga - rundtur frå støyl til støyl

Hammarsegga gir ei kjensle av høgfjell sjølv om du på mange måtar er i låglandet i Jølsterfjella. Turen gir mykje flott utsikt, og passar godt dersom det er skodde og snø på dei høge toppane rundt Jølstravatnet. Som kveldstur i godveir vil du oppleve nydeleg solnedgang i vest. 

Turstart ved Jølstravatnet og rett opp til Kjelsnesstøylen på god sti. Sjå lenke med eiga turskildring opp til Kjelsnesstøylen. Det er noko bratt terreng å gå i opp til støylen. Frå støylen går du vidare mot Hammarsegga i søraustleg retning på delvis sti. Frå toppen av egga får du flott utsikt mot vest og aust, og ser Jølstravatnet og store delar i kring.

Frå toppen av egga går du vidare over egga i noko myrlendt og vått terreng. Det er ikkje sti frå Hamarsegga og vidare til neste støyl. Du passerer nokre små elvefar som er greie å passere. Omlag halvveges frå egga mot Hamarsbakkestøylen går du forbi ein steinformasjon som er eit flott utkikkspunkt. Her ser du også rett ned på Hamarstøylen, som ligg litt lenger nede i lia. Du kan gå ned til denne støylen, og følgje stien her i frå og ned til Jølstravatnet også. Om du går til Hamarsbakkestøylen, slik GPS-sporet her gjer, følgjer du stien frå denne støylen ned att til Jølstravatnet. Sjå lenke for å få grundigare skildring av turen ned att frå Hamarsbakkestøylen til Jølstravatnet. Vel nede att følgjer du fylkesvegen attende til startpunktet.

I dag er det mest berre dyretrakk å sjå som stiar mellom dei tre støylane i dette området. I gamle dagar, når det var støylsdrift, var det annleis. Då var det gode stiar mellom støylane sidan støylsfolket ofte besøkte kvarandre.

Turen tek 3-4 timar som rundtur. Området har ein del beitedyr, og du passerer fleire grinder. Det er viktig at du let desse att etter deg.

AC Kapstad for IST