Heggjoløypa

Heggjoløypa er ei sentrumsnær turløype som du kan komme inn på frå fleire stader langs løypa, og såleis kan du gjere turen din så lang eller kort som det høver deg! Startar du turen frå parkeringsområdet ved SR-Bank Stadion Ølen er det god gratis parkeringsplass her. Du kan og køyre langs den gamle Etne-vegen til Hellevad og parkere der. Derifrå kan du og nytte turvegen vidare til Etne via Fikse.
Heggjoløypa går langs Oselva frå Steinbru og over brua ved Dørheimsvegen, vidare forbi Laksetrappa ved Rabbafossen og innover flatene, kor elva renn roleg med nokre tersklar og små hølar mot samkomma der elva frå Tveitadalen og elva som har sitt utspring på Hiksdal og Oppheim kjem saman. Det er mykje gamal lauvskog langs løypa, og ein kan oppdage mange ulike småfuglar og dyreliv om ein går her på rette tida. På sommaren er det idyllisk med alle markblomane langs elevekanten. Det er og sett ut benker fleire stader som ein kan kvile seg på. Løypa er gang- og sykkelveg på grus frå SR-Bank Stadion Ølen til Hellevad, derifrå og tilbake til Steinbru er det køyreveg dersom ein vel å ta rundturen. Hugs at du går langs eng som skal verte til mat for husdyr - ikkje kast metallboksar eller anna søppel langs løypa! God tur :-)