Nipebu

Beliggenhet

Nipebu ligg idyllisk til ved Langevatnet, omgjeven av avrunda fjell og ope høgfjellsterreng, om lag 500 moh. Beliggenheita gjev gode høve for både rolege naturopplevingar og lengre fjellturar. Hytta ligg skjerma, men samtidig ope til, med utsyn i fleire himmelretningar. Dette gjev ei særmerkt kjensle av å vere midt i naturen, samstundes som det er lett å orientere seg i landskapet. Ein har utsyn over Langevatnet og dei markante fjelltoppane i Dalsfjordområdet. Frå hytta er det kort veg til andre fiskevatn, utsiktspunkt og god plass for teltliv og utforsking av området. Sjå merka turruter under ankomstbeskriving lenger nede på sida.

Rom

Hytta har totalt plass til inntil 20 personar.
Det er 10 faste sengeplassar fordelt på fire rom som kan førehandstingast. Rom 1–3 har inngang frå stova inne i hytta, medan rom 4 har eigen inngang frå utsida. Dersom ein ønskjer oppvarming i rom 4, kan ein nytte propanomn frå uthuset.

I tillegg til dei faste sengene er det ein hems med åtte madrassar og ein sovesofa. I uthuset er det ei seng som eignar seg for hundeeigarar. Denne kan også nyttast i kjølige periodar, då rommet har oppvarming frå propanomn.

Nøkkel
Hytta er pr.dags dato ulåst.
F.o.m januar 2026 vil hovudhytta bli låst med DNT-nøkkel. Du må då enten reise saman med eit DNT-medlem, eller førehandsbestille slik at du får kode til nøkkelboks.

Utstyr

Nipebu er sjølvbetent, med eit avgrensa matlager som kan nyttast mot betaling.
Hytta er utstyrt med solcellepanel, gasskomfyr og vedomn. Det er kjøkkenutstyr, kjelar, steikepanne, bestikk og servise til om lag 20 personar.

Det er dyner og puter i alle sengene, men ein må ta med eige sengetøy eller sovepose. Enkel reingjeringsutrustning og tørkestativ finst på hytta.

Toalett er i eige bygg utanfor hovudhuset.

Aktivitetar

Inne i hytta finn du mellom anna kortspel og ein ustemd gitar.
I naustet, eller i vika rett nedanfor hytta, finn du båt og kano. Bruk alltid redningsvest.
Hugs å legg kanoen opp ned etter bruk, og ta ut lenseproppen i båten slik at han ikkje fyller seg med vatn. Det er fleire gode fiskevatn i området, og det ligg fiskestenger til utlån på hytta.

Vatn

Om sommaren er det innlagt vatn i hytta via eit pumpesystem. Når dette ikkje er i drift, må ein hente vatn frå vatnet ovanfor hytta. Det blir anbefalt å koke vatnet før bruk som drikkevatn.

Hund
Hund skal ikkje inn i hovudhuset.
Hundeeigarar er velkomne til å nytte seng og hundebur i uthuset.

Naturvern

Hugs alltid sporlaus ferdsel. Vis respekt for beitedyr og overhald bandtvang.

Bestilling og betaling

På denne hytta kan du bestille overnatting digitalt (grøn knapp). Då har du førehands tilgang til bestilt sengeplass fram til kl 19.00 på ankomst dag. Om du tar turen uten å ha bestilt, vil det alltid vera moglegheit for overnatting . Spontane besøk kan betalast på vipps eller til kontonummer, betalingsinfo finn du på hytta eller i lenka for prisinformasjon.

Hugs å skriv deg i hytteprotokollen. Det er først når du har skrive deg inn i protokollen, at du har rettar på hytta.

Drift og tilsyn skjer på dugnad. Dersom du har spørsmål, ta kontakt, tlf: 413 37 213 eller til indresunnfjord@dnt.no

DNT-medlemskap

Me har rabatterte prisar på hytteovernattinga til medlem. Meld deg inn i DNT for medlemspris du også! Samstundes støtter du det gode arbeidet som vert lagt ned av DNT!

Mobilforhold

På Nipebu er det stadvis dekning. men ein må leite litt rundt i terenget for å finne plassar der det går å ringe. Oppe på haugen ca 100 meter aust / søraust for hytta er det bra dekning.

På GPS finn du hytta her: UTM 32V 0304459 6812998

Historie

For den historieinteresserte kan vi nevne at bua opna 9. juni 2001. Uthus vart bygt i 2002, naustet i 2004 og utedoen var ferdig 2007.

_____________________

Denne hytta har fått støtte av overskuddet fra spillemidlene til Norsk Tipping.