Fottur til Flugestøylen

Legg til huskeliste

Annonse

Fjordane
Enkel fottur
4,7 km
2 t
Turen går tur/retur samme vei
130 høydemeter totalt
Sesong: Mai - nov

Flugestøylen er ein fin og kort støylstur. Stien er svært god, og går i relativt lett kupert terreng i open furuskog. Turen passar godt som familietur for alle aldersgrupper. Støylen ligg vakkert til i ope og roleg dalføre, og har fleire fine støylshus.

Frå parkeringa går du nokre bakkar på skogsveg opp til ein velteplass. Her tek du av vegen og inn på traktorveg fram til Kvilesteinen. Frå her går du tidvis på traktorveg og sti fram til Skoregrova. Dette bekkefaret kan i regnfulle periodar vekse og få rik vassføring.
Du går i nordlig retning med jamn stigning heile vegen inn til Flugestøylen, og passerer Vårstøylen på venstre side når du har gått 3/4 av ruta. Her er det eitt sel.

Undervegs er stien skilta med ulike lokale stadnamn på punkta du passerer. Så her passerer du både Huldrehogen, Sukkergrova og Purkehogen. Dette er spanande delmål for både store og små turgåarar.

Tips
På våren er dette ein stad der sola kjem tidleg. Om våren i snøsmeltinga, og på våte dagar, kan elvefar vekse slik at det kan vere utfordrande å kome over heilt tørrskodd.

Flugestøylen er ein koseleg og idyllisk støylsplass å raste på. På varme sommardagar er det fint å bade i elva som renn nedanfor støylen.

Turen til Flugestøylen passar òg godt som joggeterreng, og er og mykje brukt av turlystne som vil ut på regntunge dagar.

Om du ønskjer å forlenge turen kan du gå over elva på Flugestøylen. Brua ligg rett ved støylen i nordvestleg retning. Her går det ein sti vidare i fjellsida i skogsterreng bort til Hjellbrekkestøylen. Frå denne støylen kjem du ned på gardane på nedre Hjelmbrekke.

Fakta
Turen er på omlag 2,5 km kvar veg og 150 høgdemeter.
Tid: 45-60 min opp og 1,5-2 timar t/r.

Hugs:

All ferdsel er på eige ansvar
Du kan ferdast fritt i utmark til fots
Fri ferdsel skal ikkje vere til skade eller ulempe for andre, eller for plante- og dyreliv
Det er bandtvang i Sunnfjord kommune i perioden 1. april – 1. november
Der stiane går over innmark og beiteområde må du vise ekstra omsyn, og late att grindane etter deg

Turen er lagt ut av for Indre Sunnfjord Turlag
ved Anne Cecilie Kapstad, redaktør for UT-turar i Jølster

Adkomst
Stoppesteder
Google Maps

Adkomst med egen bil

Ta av Jølstravegen (E39).

Avkøyring på Hjelmbrekke: Køyr av der det er skilta mot Hjelmbrekke og opp Hjelmbrekkevegen. Følg vidare opp på vegen Furehogen til der den møter Storetrævegen. Følg denne vidare opp til parkeringsplassen.

Avkøyring ved Jølstraholmen senter: Køyr av der det er skilta mot Flugekvam. Følg Storetrævegen opp til parkeringsplassen.

Parkering: Du parkerer på garden Flugekvam. For å finne denne køyrer du opp Storetrævegen, over ei ferist, og eit kort stykke på skogsveg. Her er det merka av til parkering ved ei redskapsbod. Her kan du parkere mot betaling (Vipps).

Pass på å parkere der bonden har merka av for dette, og set frå deg bilen slik at du ikkje er til hinder for trafikk eller gard- og skogsdrift.

Dette er eit mykje brukt turmål, og det kan bli mange parkerte bilar. Pass derfor på å parker slik at det vert plass til andre som og vil ut på tur.

Adkomst med kollektivtransport

Gå av bussen på ein av haldeplassane ved Hjelmbrekkefeltet langs Jølstravegen/E39. Frå bussholdeplassen går du 1-1,5 km opp byggefeltet til turstart ved gardane ovanfor byggefeltet.