Fottur til Hegrenesnipa frå Årdalen

Alle dei tre rutene fjelltrimmen i Jølster har merka med startpunkt i Årdalen vil gi deg stor utsikt i både austleg og vestleg retning langs Jølstravatnet. Toppane er på kring 900-1070 moh., og ligg i eit ope fjellterreng med gode stiar. Turane er ikkje lenger enn at fjellvande folk kan nå fleire på same dag.

Følg skogsveg i vestleg retning opp til Øyskaret. Her kan du velje tre ulike ruter vidare. Frå Øyskaret går du på god sti i sørvestleg retning mot toppen. Varden ligg ca 100 meter vidare frå toppen. Flott utsikt over Ålhus frå Varden.

Turen er godt skilta og merka av Fjelltrimmen i Jølster IL.

Tips:
Om du ønsker ein lenger tur kan du frå Øyskaret ta turen oppom til Bjørsetfjellet eller Tverrlifjellet. Begge desse er godt merka og skilta av Fjelltrimmen i Jølster IL.

Frå toppen av Hegrenesnipa kan du og velje å gå ned til Ålhus via Skarstøylen. Sjå lenke for informasjon om denne turen.

Fakta:
Hegrenesnipa frå parkeringa 3,4 km, stigning 610 høgdemeter. Tid: 2,5-3 timar opp.

Hugs:

• All ferdsel er på eige ansvar
• Du kan ferdast fritt i utmark til fots
• Fri ferdsel skal ikkje vere til skade eller ulempe for andre, eller for plante- og dyreliv
• Det er bandtvang i Sunnfjord kommune i perioden 1. april – 1. november
• Der stiane går over innmark og beiteområde må du vise ekstra omsyn, og late att grindane etter deg

Turen er lagt ut i samarbeid med Fjelltrimgruppa i Jølster IL.